जामखेड:३ सप्टेंबर २०२६
मराठा आरक्षणासह समाजाच्या विविध न्याय्य मागण्यांसाठी अंतरवाली सराटी येथे उपोषणास बसलेले संघर्ष योद्धा मनोज जरांगे पाटील यांच्या आंदोलनाचा आज सहावा दिवस आहे. उपोषणामुळे त्यांची प्रकृती सातत्याने खालावत असून, या पार्श्वभूमीवर जामखेड तालुक्यातील अखंड मराठा समाजाने तीव्र चिंता व्यक्त केली आहे. जरांगे पाटील यांच्या आंदोलनाला पूर्ण पाठिंबा देण्यासाठी आणि सरकारचे लक्ष वेधण्यासाठी शुक्रवार, ४ सप्टेंबर २०२६ रोजी ‘जामखेड शहर व तालुका बंद’ची साद घालण्यात आली आहे.
या संदर्भात अखंड मराठा समाज, जामखेड तालुक्याच्या वतीने जामखेडच्या तहसीलदारांना अधिकृत निवेदन सुपूर्द करण्यात आले.
निवेदनातील प्रमुख मागण्या व भूमिका:
तात्काळ व ठोस निर्णय: मराठा आरक्षणाचा प्रश्न आणि समाजाच्या प्रलंबित मागण्यांवर शासनाने केवळ आश्वासने न देता तातडीने सकारात्मक व ठोस तोडगा काढावा.
प्रकृतीची गंभीर दखल: मनोज जरांगे पाटील यांची प्रकृती खालावत असल्याने शासनाने या विषयाचे गांभीर्य ओळखून त्वरित पावले उचलावीत.
स्पष्ट भूमिका: मराठा आरक्षणाच्या मुद्द्यावर शासनाने आपली अधिकृत आणि स्पष्ट भूमिका जाहीर करावी.
“शासनाने आता वेळकाढूपणा न करता मराठा समाजाच्या मागण्यांची त्वरित दखल घ्यावी. लोकशाही आणि शांततेच्या मार्गाने मराठा समाज आपल्या हक्कासाठी एकजुटीने लढा देईल,” असा इशारा निवेदनाद्वारे देण्यात आला आहे.
शुक्रवारी आयोजित करण्यात आलेल्या या बंदमध्ये व्यापारी, व्यावसायिक, नागरिक आणि सर्व समाजबांधवांनी उत्स्फूर्तपणे व शांततेच्या मार्गाने सहभागी होऊन आंदोलनाला पाठिंबा द्यावा, असे नम्र आवाहन अखंड मराठा समाज, जामखेड तालुका यांच्या वतीने करण्यात आले आहे.
About the Author
