अहिल्यानगर: ३०सप्टेंबर २०२६
अहिल्यानगर जिल्हा सहकारी मध्यवर्ती बँकेच्या (ADCC Bank) निवडणुकीचे वातावरण चांगलेच तापू लागले आहे. संचालक पदासाठी उमेदवारी अर्ज दाखल करण्यास सुरुवात झाली असून राजकीय घडामोडींना वेग आला आहे. आज विधानपरिषदेचे सभापती राम शिंदे यांनी स्वतः बँकेच्या संचालक पदासाठी उमेदवारी अर्ज खरेदी केला आहे.
दरम्यान, बँकेची निवडणूक बिनविरोध व्हावी यासाठी संगमनेर येथे सर्वपक्षीय नेत्यांची एक महत्त्वपूर्ण बैठक पार पडली. मात्र, या बैठकीला विधानपरिषदेचे सभापती राम शिंदे अनुपस्थित होते. संगमनेरच्या या बैठकीत काँग्रेसचे ज्येष्ठ नेते बाळासाहेब थोरात आणि माजी खासदार सुजय विखे हे पारंपरिक राजकीय विरोधक एकत्र आल्याचे पाहायला मिळाले. या बैठकीवरून आता राजकीय वर्तुळात उलट-सुलट चर्चा सुरू झाली असून सुजय विखे आणि बाळासाहेब थोरात यांनी एकत्र येत राम शिंदे तसेच खासदार निलेश लंके यांना बाजूला सारल्याची (डावलल्याची) चर्चा रंगू लागली आहे.
विखे-पितापुत्रांत मतभेद? राम शिंदेंचा राजकीय चिमटा
संगमनेर येथील बैठकीवर आणि सुजय विखेंच्या उपस्थितीवर बोलताना राम शिंदे यांनी थेट पालकमंत्री राधाकृष्ण विखे पाटील यांच्यावर निशाणा साधला. “सुजय विखे संगमनेरच्या बैठकीला उपस्थित होते, मात्र त्याबाबत पालकमंत्री राधाकृष्ण विखे पाटील यांना माहितीच नव्हती. यावरून प्रथमदर्शनी सुजय विखे आणि राधाकृष्ण विखे यांच्यात मतभेद असल्याचे दिसून येत आहे,” असा जोरदार चिमटा राम शिंदे यांनी काढला. तसेच, “संगमनेर येथे पार पडलेल्या या बैठकीबाबत पालकमंत्री राधाकृष्ण विखे पाटील यांनी स्वतः समोर येऊन आपली भूमिका स्पष्ट करावी,” अशी मागणीही राम शिंदे यांनी केली आहे.
बाईट (Byte / कोट):
“मी स्वतः जिल्हा बँकेच्या निवडणुकीसाठी उमेदवारी अर्ज खरेदी केला आहे. संगमनेरच्या बैठकीबाबत सांगायचे तर, सुजय विखे त्या बैठकीला गेले होते पण पालकमंत्री राधाकृष्ण विखे पाटील यांना याची कल्पना नव्हती. यावरून विखे पिता-पुत्रांमध्ये मतभेद असल्याचे उघड दिसते. या संगमनेरच्या बैठकीबाबत पालकमंत्र्यांनी स्वतः समोर येऊन स्पष्टीकरण दिले पाहिजे.”
– राम शिंदे (सभापती, विधानपरिषद)
About the Author
