जामखेड प्रतिनिधी/२६सप्टेंबर २०२६
जामखेड तालुक्यातील हाळगाव येथील पुण्यश्लोक अहिल्यादेवी होळकर शासकीय कृषी महाविद्यालयातील रॅगिंगप्रकरणी महाविद्यालय प्रशासनाने मोठा निर्णय घेतला आहे. रॅगिंगमध्ये दोषी आढळलेल्या सहा विद्यार्थ्यांना एका सत्रासाठी निलंबित करण्यात आले असून, त्यांना महाविद्यालयाच्या वसतिगृहातून कायमस्वरूपी काढून टाकण्यात आले आहे. याव्यतिरिक्त, प्रत्येक विद्यार्थ्यावर एक हजार रुपयांचा आर्थिक दंडही ठोठावण्यात आला आहे.
नेमकी घटना काय?
काही दिवसांपूर्वी, महाविद्यालयातील प्रथम वर्षाच्या तीन विद्यार्थ्यांना वरिष्ठ विद्यार्थ्यांनी रॅगिंग करत अमानुष मारहाण केल्याचा धक्कादायक प्रकार समोर आला होता. या गंभीर घटनेची दखल घेत जामखेड पोलिस ठाण्यात चार विद्यार्थ्यांविरोधात गुन्हा दाखल करण्यात आला होता.
या प्रकरणाची गंभीरता लक्षात घेऊन महाविद्यालयाच्या प्राचार्यांनी पाच सदस्यीय चौकशी समिती नियुक्त केली होती. समितीने सखोल चौकशी करून आपला अहवाल सादर केला. या अहवालात सहा विद्यार्थी दोषी आढळले. त्यानंतर, महाविद्यालय प्रशासनाने तातडीने कारवाई करत या सहाही विद्यार्थ्यांचे शैक्षणिक नुकसान टाळण्यासाठी त्यांना एका सत्रासाठी निलंबित केले आहे. तसेच, त्यांना वसतिगृहात राहण्यास कायमस्वरूपी मनाई करण्यात आली आहे. शिस्तभंगाची कारवाई म्हणून प्रत्येकी एक हजार रुपये दंडही वसूल केला जाणार आहे.
महाविद्यालय प्रशासनाच्या या कठोर भूमिकेमुळे कॅम्पसमध्ये रॅगिंगसारख्या प्रकारांना आळा बसण्यास मदत होणार आहे. दरम्यान, या प्रकरणातील पोलिस तपास अद्याप सुरू आहे.
About the Author
